今時今日咁嘅服務態度，點得o架！講緊邊個？咪就係港鐵囉。眾所周知，港鐵年年賺大錢，年年勁加價，但服務質素就毫無改善，好似尋日咁吖，又出事嘞，因為有直通車跪低導致東鐵線全線受阻，多個月台逼滿乘客，水洩不通，場面混亂，多人不適，怨聲載道，卒之擾攘咗四十幾分鐘至恢復正常。你話喇，港鐵咁嘅服務態度得唔得吖？又值唔值咁嘅價錢吖？
最荒謬嘅係，港鐵年年加價仲振振有詞添，可加可減吖嘛，按本子辦事，市民就算不滿，都奈佢唔何。好嘞，可加可減機制唔經唔覺已實施五年，終於係時候檢討，當局早前聘請顧問公司研究，最近又推出文件進行公眾諮詢。不過有學者踢爆，政府嘅諮詢文件非常簡單，連一個修改方案都冇，等於畀市民一張白紙自由發揮，想畀意見都無從入手。咁搞法，唔通又係掩人耳目？
話時話，港府當初推出可加可減機制，原意係令票價調整透明化，本來係好事，弊在當局做嘢慢幾拍，通縮時候唔出手，等到通脹重臨至推出，結果可加可減變成只加不減，弄巧反拙。最離譜係，可加可減機制只計算物價變動指數及運輸行業人工變動指數，完全冇計算市民負擔能力，更加冇計算港鐵盈利情況。呢，舊年港鐵賺一百四十七億，今年照樣加價百分之五，你話係咪無良吖？
正如學者話齋，可加可減機制已經失去原意，就算政府唔想大刀闊斧修改，亦應該考慮為票價加幅「封頂」。點樣封頂？一係每年為港鐵訂定合理盈利水平，超出水平即取消加價；二係限制加幅不超過薪酬趨勢調查嘅結果，或低於平均薪酬加幅一至二個百分點，讓打工仔可以逐步減輕車費負擔。嗱，辦法就提咗出嚟喇，港府究竟肯唔肯考慮，係唔係以民為本，全港市民(目及)住o架。
有個邏輯問題，功夫茶諗極都唔明，市民係政府嘅老細，而政府又係港鐵嘅大股東，咁點解大股東會縱容港鐵向市民吸血呢？有個例子係咁嘅，有位住天水圍嘅打工仔到灣仔返工，月薪七千元，但一日交通費就超過五十元，人工唔見咗一大橛，試諗吓，咁點樣鼓勵市民跨區就業呢？
一句到尾，市民對港鐵票價只加不減，早已忍無可忍，當局如果繼續坐視不理，只會搞到天怒人怨。香港社會已經夠政治化嘅喇，當局都唔想火上添油，係咪？新政府成日將「民生無小事」掛喺口邊，希望唔係齋噏喇，唔該趁住今次檢討可加可減機制，認真收拾呢隻吸血怪獸，唔好再畀佢害人害物嘞！