政情：讀寫障礙黃之鋒得把口
學民思潮召集人黃之鋒平時面對傳媒時牙尖嘴利，但原來佢有讀寫障礙，一返到學校默書就即刻「撻Ｑ」，連以前嘅班主任都話佢係死剩把口。不過，佢尋日都算吐氣揚眉，因為獲教協設立嘅「司徒華教育基金」頒個好學生獎畀佢。黃之鋒得獎不知幾開心，仲話呢個獎證明咗成績唔一定要攞到「五星星」先係叫好學生，學生都要做好社會公民角色喎。
黃之鋒攞獎時發言話，自己平時喺學校冇咩機會上台，因為有讀寫障礙，小學默書成日都要溫習到凌晨兩、三點鐘。雖然好勤力，但小四至小六默書合格嘅次數加埋都唔夠十次，所以小學班主任都話佢︰「黃之鋒，你就係死剩把口！」自言依家都係死剩把口嘅佢，背《再別康橋》都仲係要媽媽陪佢一齊背，所以今次佢攞好學生獎，連同學都好詫異，仲反問佢：「你攞（獎）呀？」