政情：馮偉華證非患前列腺癌
教協會長馮偉華早前因為懷疑患前列腺癌而退選立法會教育界功能界別，改由總幹事葉建源頂上。馮偉華尋日出席教協一個頒獎禮時，精神都尚算唔錯，原來佢經過檢查後，已經證實咗唔係患癌，只係前列腺組織增生。佢仲話，下星期開始返大學教書，亦冇計劃辭去教協會長職位。佢身體冇事當然開心啦，但成功當選嘅葉建源就講笑話，好似被人屈咗入立法會咁喎。
馮偉華話，雖然唔係患癌，但癌症指數仍未降番低，所以仲要食藥同定期檢查，依家都仲好怕凍，但已經可以做吓運動。當初放棄參選都有人質疑佢係咪有黑材料被人揸住，佢就話唔理得啲人點講，當時係一定要做決定，又話如果有黑材料都一早被人爆晒喎。
至於葉建源當選，馮偉華就話放下心頭大石，唔使再怕自己累咗教協。不過我哋問葉建源係咪好似被屈咗入立法會，佢就講笑話：「直情係啦，當時捱義氣，依家又唔可以畀番（議席）佢！」但拍檔身體冇事點都係開心嘅。