有消息人士相信，現任全國人大常委范徐麗泰將角逐連任，而盛傳因年齡到達上限嘅全國人大代表、基本法委員會委員譚惠珠，就可能會再做一屆，除基本法委員會要有人大代表外，亦因為喺人大入面點都要有啲一哥、一姐撐場。至於新界社團聯會（新社聯）同九龍社團聯會則希望由新人接任人大嘅位置。
我哋之前講過，新社聯理事長陳勇會接棒參選人大，尋日佢出席一個活動後承認，暫時的確有呼聲希望佢會接棒參選人大，但坦言今屆人大選舉跟以往唔同，戰況會異常激烈，所以就算新社聯真係推薦佢代表出選，都唔一定贏硬，有可能攞到新社聯代表嘅一百五十票，話唔定要喺三十六個席位嘅最後嗰十位徘徊喎。