電視台有一個節目鼓勵觀眾撳錢，原來現實世界真係有人可以隨時隨地撳人哋嘅錢o架。點樣撳法呢？嗱，如果你係一個的士司機，你可以狂撳咪錶上面嘅行李費同隧道費，本地人身為識途老馬當然唔會上當啦，初到貴境人生路不熟嘅外來遊客就好容易被搵笨嘞。
呢一招撳錢大法唔係功夫茶老作，實屬真人真事有根有據。有一對加拿大籍華裔年輕夫婦，搭飛機由北京來港辦理簽證，兩人一出機場就搭的士，目的地係灣仔區一幢商業大廈。的士司機開車期間不斷暗中撳咪錶掣，又加行李費，又加隧道費，落車盛惠四百幾銀。外來人士不虞有詐吖嘛，鬼知你香港人咁蠱惑嘅咩，乖乖付上不合理嘅昂貴車資。點不知的士司機唔止濫收車資，更加係猖狂到明搶嘅賊佬，佢一見兩人離開車廂即刻踩油絕塵而去，將乘客嘅行李據為己有。
好彩，遊客都唔傻得晒，受害人記低車牌報警。灣仔警區重案組聯同機場警區翻查的士站閉路電視片段，以及的士出入閘紀錄，鎖定好幾架形迹可疑嘅賊的士。終於，探員趁疑似賊的士重返機場，上前截查發現報失嘅行李，三十六歲姓周司機涉嫌盜竊及以欺騙手段取得財產而被捕。警方話呀，賊的士可能唔止一人，司機結黨犯案，正在深入追查。
的士司機竟然係明搶暗騙嘅死賊佬，如果呢一個消息傳咗出去，你估對於香港嘅形象及旅遊業會有乜嘢影響吖嗱？舉個例吖，以前有個叫做林過雲嘅的士司機，又姦又殺又碎屍，卒之搞到的士業界拍烏蠅，莫講話黃花閨女三更半夜唔敢搭的士，連唔少男人都怕怕啦。即係咁，假如任由賊的士通街走，冇人搭的士之餘，分分鐘遊客都嚇到雞飛狗走，唔揀香港作為消費目的地。大家唔好唔記得，十一黃金周即將來臨，萬一內地同胞敬而遠之，唔通搵個死賊佬賠償香港經濟損失咩？
所以咯喎，有立法會議員就講得啱o架，無良司機向旅客濫收車資甚至搶劫財物，嚴重影響東方之珠聲譽，現時法例刑罰過輕，助長業界敗類變本加厲，促請當局加重刑罰，研究吊銷執業牌照，終身不能重操故業先至夠阻嚇作用。
開講都有話啦，治亂世用重典，如果唔諗辦法重重懲罰賊的士，業界敗類又點會收斂呢？家陣販賣別人私隱都有可能坐監啦，的士司機搶劫乘客財物咁嚴重嘅罪行，釘牌真係唔算不合理喎。
計功夫茶話齋，啱o架嘞，治敗類一於用重典啦。對壞蛋仁慈即係對好人殘忍，奉公守法嘅的士司機都唔想受到拖累而拍烏蠅吖嘛。