政情：洪綺敏返新工清減咗
做過電視台主播，又幫過梁振英競選特首嘅洪綺敏（Cathy），年初曝光率甚高，但近期轉趨低調，事關已經過檔擔任香港中國商會副總幹事兩個幾月。Cathy話，返新工後瘦咗，係因為以前做競選工作時要到凌晨先至食晚飯，食完又要即刻瞓覺應付第二日嘅工作，所以好易肥，但依家就唔使捱夜喇，加上商會工作時間比較穩定，唔使成日食消夜，身材自然Fit啦！
既然瘦咗，有記者就問Cathy瘦咗幾多磅，條褲頭係咪鬆好多？點知應付慣傳媒嘅Cathy非常幽默，話自己向來唔着褲嘅，當堂嚇親在場嘅記者。好彩佢即時補多句，話自己着裙o架嘛！
又有人問Cathy會唔會加入政府，再次同CY聯手合作？Cathy就笑笑口話，唔答呢個問題喎。之後有人再追問佢係咪會加入政府做政治助理，佢都係繼續笑笑口唔答，睇嚟Cathy嘅政治公關技巧又進步咗喇。