十月一日黃金周，唔識宰客都要偷，點解咁講？因為旅遊旺季係不法分子做世界嘅大好良機，家陣國內同胞一個二個身光頸靚，穿金戴銀周身名牌大搖大擺，梗係容易淪為待宰羔羊啦。
香港雖然被吹捧為貨真價實嘅購物天堂，引得無數水貨客逼爆上水，千方百計將冇毒嘅奶粉以及傳聞可以美容兼豐胸嘅益力多運上內地，之但係開講都有話，樹大有枯枝，族大有乞兒，購物天堂潛伏咗唔少黑店敗類。
根據海關數字顯示，今年頭八個月接獲一百三十四宗涉及珠寶玉石、海味同電子產品交易嘅投訴，較去年同期大幅上升五成一，其中內地遊客投訴嘅個案有三十九宗，升幅接近三點三倍，你都咪話唔得人驚。黑店宰客嘅手法層出不窮，主要嘅伎倆離唔開落選特首唐英年嘅超級金句：你呃人！
整體投訴嘅六成八個案涉及海味，大部分係消費者懷疑購入假貨或者被誤導，次貨充貴貨，水貨充行貨，單位價格以両代斤等等，甚至將海味以迅雷不及掩耳嘅超高速度切片磨粉，然後以米已成炊嘅既定事實強迫消費者畀錢。即使消費者眉精眼企發現被騙，黑店亦會訛稱信用卡交易不可取消而拒絕退款。
比較好彩嘅係，原來海關都察覺到事態嚴重，唔似得一般官僚主義者咁樣癡呆遲鈍冇反應。海關話喎，十．一黃金周將會加派人手巡查，特別於購物熱點屯駐重兵放蛇偵查。同時咯喎，海關又有快速行動隊伍隨時候命處理緊急投訴。海關現時負責處理違反《商品說明條例》投訴嘅編制人手有七十幾人，會靈活調派打擊不良銷售手法。
呢嗱嗱嗱，假如海關以霹靂手段掃蕩黑店，掃到無良奸商片甲不留，功夫茶係舉腳贊成o架。你知啦，購物天堂呢個金漆招牌得來不易，冇理由任得幾粒老鼠屎搞臭成鍋粥啫。咁啦，既然黑店宰客不手軟，海關掃蕩就要盡可能手硬，否則連法治之區嘅招牌都蒙污，咁就眼冤啦！
至於小偷問題，都唔可以忽略o架。警方指出，去年有五百八十一名內地遊客被盜竊，雖然只比前年微升百分之六，但係比起二○○九年就急增四成五。
唉，其實講真吖，橫睇豎睇特區政府都幾似黑店o架。好似將軍澳居屋咁吖，最近陸續出現保養問題，繼英明苑之後，同區居屋景明苑又有大廈外牆紙皮石同石屎剝落，單位滲漏毛病都相當嚴重。居民埋怨多次尋求曾蔭權政府協助都冇聲冇氣，擔心石屎砸傷途人要面對巨額賠償。你話嘞，前朝係咪黑店吖？
點都好啦，十月一日黃金周，掃完黑店捉小偷！