探射燈：尼泊爾邊青黑幫生力軍

第一代以印巴裔為主

現時元朗及油麻地均聚居不少南亞裔人士，由於這群小數族裔被視為「勇悍善戰」，所以早年有本地黑幫向其招手，組成以印巴裔為主的南亞黑幫兵團，部分人至今已晉升至黑幫頭目位置，為擴張勢力，向南亞裔新一代埋手。上月底兩批尼泊爾青年男女，在油麻地佐治五世公園聚集時發生衝突，雙方合共六十人劍拔弩張，期間更有人手持一呎長菜刀。當日被警方拘捕人士當中，最細年僅十四歲，而前日在元朗的一場廝殺中死亡的尼泊爾青年，亦年僅十九歲。

元朗走到油麻地開片

家住油麻地的十五歲尼泊爾少年Aadi（化名）晚上經常到佐治五世公園蹓躂，當晚目擊「晒馬」場面。「佢哋其中一班人嚟自元朗，佢哋出嚟油麻地就係為咗同班同鄉打架，結果警察嚟到，帶走好多人。」他直言當晚雙方根本是有備而來。「佢哋一嚟到就互相挑釁，我諗可能佢哋一早有積怨，如果唔係點會連刀都帶埋喺身。」

在晚上，元朗街頭不時可見尼泊爾裔青年聯群結隊在街頭遊蕩。	放大圖片	上月，兩批南亞裔青少年在佐治五世公園發生衝突。

據知情人士表示，連串事件反映黑幫已經成功滲透尼泊爾族群。「喺南亞裔裏面，尼泊爾係屬於最單純嘅一群，以前好少搞事，黑幫就係睇中佢哋呢啲性格，服從性高，叫佢做嘢聽聽話話，近年開始吸納佢哋做跑腿，又或者打手。」他指出，南亞黑幫已完全參考本地黑幫運作，以「跟大佬」形式「收o靚」，在黑幫撐腰下，讓他們在朋輩中蝦蝦霸霸「攞吓威」，適當時候就安排他們為黑幫工作。

放大圖片	一名少年早前與父親在錦田，遭廿名南亞裔童黨搶劫及毆打。	南亞青年隨手拿起雪糕筒揮舞，途人見狀亦急步離去。

除了油麻地，元朗南邊圍、喜利徑一帶平日亦有不少尼泊爾青年聚集。「啲南亞黑幫最鍾意喺附近打躉，乘機揀蟀，性格好勇鬥狠又或者要威要逞強的就成為招攬對象。為了令對方聽聽話話，最簡單方法就是以毒品控制。」

對吸毒危機意識較低

十八歲的尼泊爾青年Gagan（化名）就曾被毒品控制，被迫參與不法活動。「中學畢業後，搵唔到嘢做，周圍去玩，重遇啲印巴裔舊同學，初時佢哋又請食飯又去玩，叫我食Ｋ仔同大麻，之後我上咗毒癮，佢哋就要我帶貨（毒品），先畀Ｋ仔我。」Gagan不諱言，由於不少南亞人「老家」傳統，吸食軟性毒品十分普遍，所以對毒品危機意識較低，而且印巴裔的旁遮普語與尼泊爾語相近，因此印巴裔黑青更容易將尼泊爾青年「染黑」。

警方發言人表示，涉及非華裔罪犯的案件主要是店舖盜竊、雜項盜竊、扒竊及毆打。而近年非華裔人士犯罪數字佔整體罪案率有明顯上升趨勢（見表）。以元朗警區為例，去年非華裔人士佔區內罪案率是百分之四點一，但今年首七個月計，則是百分之五點四。

香港社區發展網絡總幹事龍緯汶指：「因為語言溝通唔到，尼泊爾青年好少去社區中心，佢哋只會喺公園或街玩，多咗機會畀黑幫接觸佢哋。」他補充，毒癮與南亞裔青年犯案有直接關係。「如果佢哋要得到毒品，惟有幫黑幫打打殺殺，從事非法活動，引發好多治安問題，警方不容忽視。」

圖：崔祖佑、甘偉倫/文：鄭宗夏