喺立法會新界東選舉論壇上，憑住一句「四眼仔」而成名嘅商人陳國強，雖然低票數落敗，連保證金都攞唔番，但佢對從政嘅決心似乎未變，事關佢表明會轉戰區議會選舉。沙田區議會鞍泰選區將會進行補選，陳國強尋日喺社交網站宣布參選，仲諗住以「建設品味馬鞍山」做主打政綱，肯定會為今次平平無奇嘅區會補選帶來唔少趣味性。
陳國強冇樁腳、冇資源，但佢喺選舉論壇上表現出色，狙擊各個政黨，成功贏得一班網民歡心，估唔到佢咁快再接再厲，尋日宣布參加區議會補選，仲打正旗號要建設品味馬鞍山，究竟一個地區可以點樣品味法，真係要拭目以待喇。
鞍泰選區個議席本身係民建聯擁有，據聞佢哋都會派人出選，但目前仲未決定派邊個，如果佢哋知道陳國強呢位「強人」參選後，會唔會調整策略呢？至於新民主同盟就由年僅廿四歲嘅後生仔陳珮明出戰，佢做過立法會議員助理，唔知佢會否同陳國強聯成一線迎戰民建聯呢？