政情：不忿鎅票 嫻姐頂住條氣
有人話選舉過後要向前看，所有新仇舊恨都應該放低，但仇恨呢樣嘢，唔係話放就放。當選超級區議會議席嘅工聯會陳婉嫻，聲稱喺選舉期間遭民建聯（民記）鎅票，做唔到全港票后嬲到震，要即刻離港散心。嫻姐尋日終於現身，透露過去八日去咗日本一個「樹木好多」嘅地方休息散心，但尋日見佢仲有兩聲咳，似乎仲未抖順條氣喎。
嫻姐話選舉前都冇乜事，但一選舉完，壓住喺氣管入面嘅嘢都走晒出嚟，搞到上、下呼吸道都受感染。究竟係乜嘢壓住咗條氣管，嫻姐冇透露，莫非係被人鎅票嗰啖氣仲頂住？咁啱嫻姐同民記李慧琼（Starry）一齊出席一個電台錄影節目，雖然兩人排排坐，但冇咩交流，連招呼都冇打。
其中一幕係節目主持人質疑Starry作為行政會議成員，點樣可以睇住樓價不斷上升時，Starry都唔知點反駁。咁啱嫻姐事後就話，做行會成員應該主動畀意見，如果一味聽意見就唔使入行會啦！