勝利沖昏頭腦，似乎係政界不變嘅事實。民協今次立法會選舉冒住滅黨風險，派出馮檢基（KK）參選超級區議會，雖然最終贏到，但就犧牲咗扎根廿幾年嘅九龍西老巢，真係前路茫茫。不過，KK似乎仲未感覺到有咩危機感，當白鴿黨大敗後開檢討會之時，民協呢個一人黨反而搞咗個助選團聯歡會，仲搵埋司馬文撐場。咩叫自我感覺良好？咪係呢啲囉！
民協近期搞嘅助選團聯歡會，有十幾廿個民協樁腳，同埋一大班義工助選團出席。雖然慰勞義工係好重要，但睇番張相就可以發現，成班民協中人得KK笑得最開心，部分人更加係強顏歡笑。近期同民協出雙入對嘅南區區議員司馬文都有現身，仲發表講話添。
不過，就算司馬文將來真係入黨，民協都要面對好多問題，但偏偏KK就唔多覺，仲不停話自己有成廿幾萬票，睇嚟佢仲未知道，好多選民係含淚投民協嘅。