政情：立會IT小隊蓄勢待發
受到立法會泛民主派「拉布」影響，政府架構重組方案焗住擱置，雖然政府仍能夠如常運作，但有資訊科技界人士對於遲遲未成立科技及通訊局（科技局）感到失望。不過唔使擔心，事關新一屆立法會原來有五個IT背景嘅議員，絕對有實力組成「IT小隊」，如果五人聯手為IT界爭取權益，呢股新勢力真係不容小覷！
立法會五個IT人來自建制派及泛民主派，包括「正印」嘅資訊科技界功能界別代表莫乃光（Charles）、白鴿黨單仲偕、民建聯（民記）葛珮帆、本身做IT嘅工程界盧偉國，至於第五位成員就比較難估，佢就係當選香港島議員嘅民記鍾樹根。原來鍾樹根以前都係IT人，雖則連佢都話自己嘅IT知識有啲過時，但佢點都做過民記嘅資訊科技及廣播事務副發言人，一啲都唔輸蝕。
講業界議題有發揮空間
雖然泛民同建制嘅政見有異，但相信「IT小隊」講到業界議題時，分歧大極有限，應該會有發揮空間，特別係催促政府加快成立科技局。我哋日前已率先講過，成立科技局嘅爭議比較少，據聞政府會率先將有關建議提交立法會作諮詢，而盛傳會出任首任科技局局長嘅楊偉雄，各黨派及業界對佢嘅反應亦尚算正面，應該問題不大。
其實喺立法會IT界落選嘅譚偉豪（Samson）任內一直都有爭取成立科技局，但有傳業界對佢太過支持政府、忽略業界聲音有微言，特別係新進IT界選民，對佢冇咩好感，就連一啲被視為親建制背景嘅新血亦有同感。睇番今次選舉結果，Charles嘅得票由上屆不足二千票，大幅升至二千八百多票，相反Samson就維持喺二千票多少少，某程度印證Samson未能開拓新票源，睇嚟建制派未來若要收復IT界失地，相信都要另覓人選喇。
不過，最耐人尋味嘅係，今次嘅廢票亦由過往嘅幾十票直線上升至二百多票，佔總投票率嘅百分之五。除咗白票外，當中亦不乏有啲難以抉擇嘅選民，選擇投晒畀兩個候選人，或者將神聖嘅一剔印喺兩個候選人中間，莫非選民覺得兩個候選人都睇唔順眼？