中環出更：楊敏德絞腦汁為理大包裝
理工大學尋日舉行「賽馬會創新樓」平頂儀式，為安全起見，眾嘉賓都要戴安全帽進入工地，向來打扮高貴嘅理大校董會主席楊敏德（Marjorie）亦都唔例外。原來今次並非Marjorie首次着住高跟鞋行入工地，佢話以前都經常去視察家族公司起緊嘅廠房，所以有晒經驗，當然頂安全帽就無今次嗰頂銀色嘅咁靚啦！
卸任行會 行勻各大學院
冇做行政會議成員嘅Marjorie話，依家可以分配更多時間服務理大，至今已經行勻各大學院，愈睇就愈覺得理大辦得好好，可惜普羅大眾對理大嘅認知就唔係咁多，所以嚟緊要努力諗多啲有趣點子去包裝，吸引傳媒去報道喎。同時要諗下點樣可以令大學與民生有更多連繫，事關大學有好多實用科目都同民生息息相關，好希望可以貢獻畀社會大眾。
「賽馬會創新樓」樓高十五層，由國際知名女建築師Zaha Hadid設計，包括設計博物館、設計廊、展覽廳等。○九年獲政府批准興建，理大要自己籌四分之一建築成本，香港賽馬會慈善信託基金則捐出二億四千九百萬元，資助「創新樓」，並成立「社會創新設計院」及支持其首三年嘅運作經費。