中環出更:QE3殺到胡官驚買貴樓

中華總商會尋日喺中環美心皇宮舉行酒會,特首梁振英率領多名問責官員出席,好多政商界人士都有嚟,仲見到已退休嘅前高等法院上訴法庭副庭長胡國興,原來胡官最近忙緊搬屋。胡官話,自己搬出後打算租樓住,因為美國QE3(第三次量化寬鬆計劃)會推高樓價,莫非佢暗示自己買唔起樓?當問及日後無得住山頂會否唔慣,胡官答話唔會,最緊要有地方住喎。

多名有商界背景嘅候任立法會議員,好似民建聯副主席蔣麗芸、金融界吳亮星、體文界馬逢國、中總代表廖長江等都有現身酒會,好多人仲主動上前向佢哋祝賀,搞到佢哋成晚握手多謝停不了。

林健鋒未入行會先爆紅

不過亦有非「議會新丁」特別受政商界人士注目,皆因盛傳立法會總商會代表林健鋒(Jeffrey)就快會加入行政會議,連中總副會長、「牛仔褲大王」楊釗都向Jeffrey連聲講恭喜。Jeffrey滿場飛,又聽到有人提早叫佢做「雙料議員」,Jeffrey發揮佢「搞爛gag」嘅急才,話「雙料」咪即係「放料同收料」囉,不過喺佢身邊嘅港區人大代表王敏剛唔放過佢,即時稱呼Jeffrey做「紅人」。總之Jeffrey行會都未入,都已經好開心。

另外,本身係全國政協常委嘅友好協進會會長陳永棋自爆,明年三月換屆時唔會再做會長,唔知邊個會做棋哥接班人呢?

棋哥畀大家嘅貼士,係舊嘅政協常委喎,大家不妨又估吓吖。

卓妮

第一手消息請下載on.cc東方互動iPhone/iPad/Android/Windows Phone Apps