【本報訊】「唔通要十六歲踎大牌檔踎到四十六歲，真係好灰」。反叛少女阿盈，五年前因吸煙鬧事被踢出校後，一直在大牌檔工作，每天面對日曬雨淋，被客人喝罵，捱過該段艱苦歲月後，她才醒覺知識可以改變命運，前年決心重拾書包到夜校半工讀，經兩年努力不懈，成績突飛猛進，考獲全班第一名，最終希望可以升讀大學，向美好人生進發。
十五、六歲時的阿盈是一名反叛少女，每天只顧飲酒開派對，又經常在校內吸煙鬧事，最終因記過太多，被學校勸喻停學。阿盈被踢出校後，媽媽表明不再給她零用錢，着她自食其力兼付家用，為了生活她只好到大牌檔打工，「每日工作十幾個鐘，洗碗、招呼客人及搬貨，樣樣都要做，但月薪只有八千元，人工低工時長，日日返工唔知為乜，無學歷又轉唔到工，感到好迷惘」。
經兩年辛酸工作，阿盈終知道少壯不努力，老大徒傷悲道理，前年決定重返校園，「依家一星期五天早上返工，晚上返學，雖然辛苦，但可以讀書令我感覺非常充實，雖然年齡比同班同學大，但我相信有志者事竟成」。
阿盈為跟上課程進度，在胞姐及男友金錢支持下，每星期兩天到補習社補習，將勤補拙，追回失去的時間。她的努力終獲回報，連續兩年考全班第一名，亦增強了阿盈的信心，「返回校園後，知道有路可行，生活充滿目標，現時只想讀好書，有朝一日踏入大學，做一個有用的人」。