有人話，唔到香港，唔知文革仲搞緊。真係一啲冇講錯o架，今時今日嘅香港七國咁亂，嘈喧巴閉，沒完沒了，永無寧日，當年內地文革都係咁上下嘅咋。嗱，國民教育又反，放寬個人遊又反，發展新界東北又反，都唔知呢班人究竟想點！
唔怪得政務司司長林鄭月娥感慨良多，形容新政府唔單止冇蜜月期，連抖氣機會都冇，講起真係無奈。雖然係咁，林鄭強調政府「做實事，說實話」，正積極落實梁振英競選政綱，惠民措施成熟一項推一項，「因為市民等唔切」。
咁又係吖，前朝政府留低咁多爛攤子，正所謂百廢待興，幾多民生政策急待落實，市民真係等唔切o架。呢，新政府上場短短兩個幾月，已提出十項惠民措施，包括推出特惠生果金等等，有人形容呢啲惠民措施仲多過煲呔曾七年任期，一啲都冇誇張。
只可惜，政府想做實事啫，但有人偏要搞搞震，喺目前嘅社會氣氛及政治環境下，呢啲惠民措施究竟可唔可以順利獲得立法會通過，仲係未知之數o架。就以特惠生果金嚟講，有議員要求當局完全不設入息審查，如果達唔到佢哋想要嘅效果，就會以「拉布」阻撓喎。事實證明，政客有心玩嘢，無所不用其極，連惠及老人家嘅政策都唔放過，就算政府想做實事，都唔係咁容易。難為林鄭仲苦口婆心，要求議員唔好將長者受惠嘅議題變成「有衝突性、有抗爭性的議會文化」，睇嚟都係對牛彈琴、與虎謀皮嘅喇！
唉，冇法子喇，樹欲靜而風不止吖嘛。近年嘅立法會烏煙瘴氣，政客不務正業，成日掛住做騷，爆粗、掟蕉、掃枱、拉布、流會，醜態百出，無日無之，搞到大量民生議題塞晒車。呢啲政客譁眾取寵，阻撓施政，令立法會淪為「垃圾會」，議員民望仲衰過政府官員，簡直累人累物，唔通佢哋自己唔覺得羞恥咩？
本來呢，新人事應有新作風，舊嘅立法會成為過去，新嘅立法會即將開波，議事廳出現唔少新面孔，好多市民希望政客能夠洗心革面，做番本分，重建立法會形象。弊就弊在社會愈來愈政治化，抗爭行動愈來愈激進，政客睇見搞搞震有市場咯喎，又點可能收手吖。
講到底，求人不如求己。林鄭希望政客唔好拉布阻撓施政，根本不切實際，最緊要應做就去做，只要政府做多啲實事，有利民生，有利香港，就算政客有心阻撓，都唔敢亂嚟喇。人在做，天在看，邊個做實事，邊個搞破壞，市民心中有數，政客好自為之吖！