佢又以一曲《問我》憑歌寄意，特別鍾意「願我一生去到終結，無論歷盡幾許風波」一句，大嘆自己多年嘅政途「三上四落」，承認仕途至今仍然未有着落，會否再有機會重返政壇就留待下回分解。
對於坊間盛傳，雖然劉江華失意立法會，但有機會更上一層樓做副局長，佢尋日就透露，的確有圈外人叫佢試下做副局長，但仲未收到特首梁振英邀請。
佢之後又話，為官者要熟悉行政同立法關係，又以運輸及房屋局局長張炳良做例子，話張炳良既做過立法局議員，又有豐富嘅行政會議經驗，依家處理唔少富爭議性政策都得心應手，莫非佢想暗示自己有條件走入問責班子呢個熱廚房効力？