政情：蔡涯棉信主更熱衷社會事
九歲就開始接觸基督教嘅房委會委員兼「梁粉」蔡涯棉，去年五十四歲先決志信神，終於喺今日會接受水禮。蔡涯棉尋日喺金鐘港福堂舉行見證分享會，話呢四十五年來，接觸過天主教並開始祈禱，又接觸佛教，睇好多佛教書，直到呢兩、三年，佢接觸基督教，亦曾聽過在場嘅特首辦主任邱騰華講見證，經深入研究後，最後喺去年十一月決志成為基督徒。
蔡涯棉話，喺佢決志信神後呢九個月期間，人生起咗好大變化，對社會及公職服務更熱衷，希望幫助市民安居樂業，近期仲積極傳播福音。對於有人話佢近期做事好高調，蔡涯棉坦言，主要係受到特首梁振英（CY）嘅誠意感動，因為CY星期日都會打電話畀佢議政，就算夜晚十一點都仲會覆電郵，所以真心覺得CY係為香港做事。
佢仲慨嘆上屆貪曾政府做得唔好，激起民怨，以住屋政策為例，好多年輕人都無力置業，要推延婚期，對香港冇歸屬感，但事實上香港嘅將來要靠呢班年輕人，所以佢好想做好本港嘅房屋政策，為香港出力。