政情：梁志祥靚太 哭訴新移民辛酸
賢內助其中一個要求就係要入得廚房、出得廳堂，相信新界社團聯會會長梁志祥（祥哥）嘅太太曹宏燕一定稱職，事關梁太除咗打理屋企嘅家頭細務外，立法會選舉期間仲跟出跟入照顧祥哥，所以祥哥當選，梁太應記一功。
原來梁太都曾經做過新移民，尋日佢出席新家園協會協辦嘅中秋活動時，就透露七年前由南京移民來港時嘅艱苦經歷，講講吓仲忍唔住喊咗出嚟添！
梁太憶述，當年人生路不熟，成日都唔敢出街，結果就困住自己喺屋企，全靠祥哥帶佢接觸地區工作，令佢有勇氣走到社區去，當初只係做義工推下啲行動不便嘅長者去飲茶，但點知喺過程中，不但可以幫人，而且仲幫咗自己；故事咁感人，唔怪得佢講到喊喇。中秋節臨近，梁太話應該會留喺屋企陪伴梁老太，因為佢由十幾年前識祥哥開始，祥哥已經將全部心機放喺地區，所以多數陪唔到梁老太㗎喇。