中環出更：莊偉茵難忘中秋燒穿被
女人長情，唔一定係對人，好似啱啱由國泰航空過檔中電擔任企業發展總裁嘅莊偉茵（Quince），佢童年嘅一張羊毛被，足足收藏咗幾十年。Quince回想細個嗰陣，屋企隨時停電，所以長期有蠟燭儲備，有年中秋節，佢同哥哥一齊匿埋喺屋企閣樓玩蠟燭，咁啱撞正嫲嫲返屋企，佢即時搵張羊毛被包住自己同支蠟燭，搞到張被燒穿咗個窿，結果畀嫲嫲打到飛起。不過，呢張羊毛被就滿載佢嘅童年回憶，就算用咗二十年、用到發霉咁滯，佢都唔肯畀阿媽丟棄，直至出嫁嗰陣先肯放棄。
Quince尋日聯同一班中電義工到匡智會同一班學童歡度中秋，仲一齊製作「太陽能」燈籠。佢話今次係過檔後首次代表中電出席活動，笑言依家日日都係試用期，做完訪問後會返公司睇番啲訪問片段，如果答得唔好，佢都會炒自己魷魚喎。不過，佢尋日回應中電加價、壟斷等等尖銳問題都能輕易拆解。除咗打得，勤力都一樣唔少得，Quince上任後呢三個星期，日日都努力「溫書」刨熟中電資料，嚟緊中秋四日假都唔放，務求盡快融入呢間百年老店。