中環出更：潮州家己冷相見歡
十‧一好快又到，城中潮州「家己冷」日前就喺金鐘港島香格里拉酒店舉行酒會歡聚，除「飼料大王」陳偉南兒子、潮屬社團總會主席陳幼南擔任大會主席外，卓妮仲見到潮州商會會長周振基（Stephen）、潮青主任葉振南、前潮青主任陳光明、潮屬社團總會前主席莊學山夫婦及名譽會董方平、觀塘區議會主席陳振彬、候任立法會議員陳恒鑌等，可謂同聲同氣。
Stephen話，上任會長後差唔多日日都返商會，皆因商會會所正進行翻新工程，又要籌劃新成立嘅婦女、公民及文化三個事務委員會，笑言仲忙過返工。Stephen早前同太太坐郵輪遊俄羅斯、挪威等地，最難忘歐洲人親切有禮，遊聖彼德堡期間，驚覺原來當地有幾百個聖殿，感覺神聖又莊嚴，但講到食，佢都係掛住中菜，一落機拿拿聲走去食番碗雲吞麵。
陳恒鑌成潮人之光
即將「升呢」做立法會議員嘅民建聯陳恒鑌（Ben）都係「家己冷」，大家爭住恭喜佢，盛讚佢係「潮人之光」。同屬民記嘅深水埗區議員鄭泳舜（Vincent）就話，佢同阿Ben喺六年前同一個酒會認識，當時阿Ben已做區議員，稱得上係「大師兄」。
近日校園爆發諾如病毒，Vincent嘅細仔都不幸中招，仲感染埋大仔同二仔，老婆忙到一頭煙，好彩細仔已經冇事。當晚仲有潮青主任葉振南拍住會員張詩培做司儀，大家首次拍檔，獲得好評如潮。
卓妮