為善最樂，福有油雞，功夫茶非常贊成做善事濟世為懷，同時又極之欣賞善長仁翁嗰種大愛無疆嘅博愛風範。如果閣下遺愛人間，好似鐵騎士林德新不幸撞車身亡，捐出心臟畀患有急性心肌炎嘅十三歲小飛魚林言臻做移植手術，功夫茶會豎起兩隻大拇指再鞠一個躬致敬。
之不過咁，家陣人心險惡，有時候捐錢賑災會變成一件愚不可及嘅大蠢事。例如大家經常捐錢去賑災嘅偉大祖國咁吖，由於貪官污吏多如恒河沙數，賑災善款往往不知所終，斷估都轉移為買屋買田又買地嘅贓款咯。所以近年來香港人捐款去內地都好有戒心，只希望幫到真正嘅災民，唔希望變成官場敗類嘅人肉提款機。
講咗咁耐，功夫茶究竟想講乜呢？即係咁，特區政府話喎，從賑災基金批出三百五十萬元畀三個機構，賑濟菲律賓風災災民。香港世界宣明會獲批一百五十萬元，救助兒童會同安澤國際救援協會（中國）分別獲批一百萬元。官老爺又話，委員會要求三個機構完成賑災計劃之後，向委員會呈交檢討報告以及帳目，確保撥款用於指定用途。
呢嗱嗱嗱，賑災救人求仁得仁係冇錯嘅，問題係，菲律賓？喂，呢一個國家嘅三世祖元首阿基諾總統，仍然欠香港人一個正式道歉，槍手屠殺人質事件依舊係港人同胞一諗起就赤赤痛嘅傷心事，特區政府使唔使咁以德報怨呀？
當然啦，大家可能會話，港殤還港殤，賑災還賑災，兩件事唔應該混為一談。如果寬宏大量嘅香港人係咁諗，功夫茶唔反對，不過有一點萬萬不能忽略，菲律賓嘅貪污程度睇怕同中國不遑多讓，你呢頭一腔熱血慷慨捐錢，一個屈尾十善款或者已經被中飽私囊。記唔記得當初菲律賓嘅「特蠢部隊」係點樣害死被挾持嘅香港遊客呀？導致冇訓練、冇裝備又冇部署嘅原因，九成九係平時舞弊瀆職囉，情況就好比慈禧太后挪用軍費去修葺頤和園，等佢老人家吃喝玩樂賀大壽。
家陣捐錢去救中華同胞都諗過度過啦，捐錢去菲律賓喎，係咪應該更加謹慎呢？善款攞去大魚大肉已經令人呻笨，萬一賓賓政權嘅貪官污吏忽然愛國，挪用善款去購買軍事裝備，準備侵佔同中國有主權爭議嘅南海，將黃岩島之類嘅土地同海域「國有化」，你話係幾咁冤哉枉也呢？
計功夫茶話齋，捐錢賑災無疑係助人為快樂之本，但係首要條件係嚴防善款益壞人。如果真係想賑濟菲律賓風災災民，功夫茶強烈呼籲，港產官僚千祈唔好懵到上心口，金睛火眼密切監視善款流向呀，大老爺！