政情：李少光話香港亂中有序
保安局局長李少光退休後緊守不在其位、不謀其政嘅原則，曝光率大減，即使偶爾現身亦唔會評論政事。佢尋日罕有出席一個新書發布會，提到自己雖然已離開政府，但仍然有留意時事。問佢點睇新政府民調同高官表現，李少光就守口如瓶，叫記者問番現任保安局局長黎棟國。但談及香港社會近排好似好亂、好黑暗，李少光就爆金句反駁：「香港幾繁榮，邊度係黑暗吖？香港本身有自由，亂中有序嘅，老百姓生活都係咁㗎啦！」
李少光又透露話，自己卸任後冇耐就飛咗去外國探望個妹，又去咗紐約度假三星期，叉足電先返香港。佢又話退休後樂得清閒，每朝六、七點就起身，有時跟太極師父耍番兩招，又約吓老友打高爾夫球，夠晒健康寫意，恨死班依家仲喺熱廚房捱緊嘅舊高官同事。