政情：慢必旅行冇「肉」照分享
人民力量成員組織之一嘅選民力量，尋日成立兩周年紀念。幾位核心成員包括候任立法會議員陳志全（慢必）、靚女成員袁彌明、人民力量主席劉嘉鴻、「星屑醫生」歐陽英傑同林雨陽等，尋日搞傳媒茶敍，透露佢哋幾位兄弟姊妹會一齊去泰國蘇梅島玩幾日，期間有人要求慢必要將啲着泳褲嘅相，放上社交網站畀啲志同道合嘅粉絲分享喎。
選民力量旅行團聽日就會出發，下周三返港。一眾團員都話，選舉實在係太辛苦，點都要搵個機會鬆一鬆。負責人民力量港島區同新界東選舉工作嘅林雨陽笑言，所有行程都係由袁彌明安排，佢嘅唯一要求就係有充足時間瞓覺。
如果有人期望睇到候任「出櫃」議員慢必嘅泳褲照，可能會大失所望，因為佢嫌自己有肚腩，唔會公開呢類「肉」照喎。劉嘉鴻尋日又話，佢哋針對民主黨嘅票債票償運動經已完結，未來會思考點樣透過立法會嘅平台，加強群眾運動嘅組織同動員能力，擴大人力喺社會嘅影響力。