政情：施榮忻一家五口抵制日本
日本爭奪釣魚島主權，觸發內地抵制日貨。菁英會榮譽主席施榮忻（Jamie）尋日喺一個公開活動上現身，佢話前排見到香港青年連日着黑衫反對國民教育，建議佢哋不如將咁高漲嘅情緒，用喺抵制日貨之上。Jamie話，國民教育係「家事」，大家有意見，就應該閂埋門傾掂佢，依家當務之急，係捍衞國家領土主權，唔好畀外人乘虛而入。
罷去日本 罷買日貨
Jamie好憤慨咁話，日本人以前殘殺中國人，依家仲想無理侵吞釣魚島，簡直係可恥嘅行為，令佢十分痛心。依家中國畀日本「恰」到上心口，大家係時候要做番啲嘢，持續抵制日資產品，唔好起哄一陣又當冇事。佢好堅決咁話，一家五口坐言起行，從今開始罷去日本旅行，罷買日資貨品，罷食日資餐廳。佢呼籲香港年輕人要有志氣，齊齊站起來響應行動，以經濟制衡日本。Jamie話，要罷買日貨並唔難，現時市面上有唔少日資以外嘅選擇，好似韓國貨咁，質量一樣咁好。