政情：建制兩派走票左右大局

泛民今屆喺地區直選取得十八席，超級區議會三席，傳統功能界別六席，合共廿七席佔整體席數三成九，比例同上屆幾乎一模一樣。但由於激進泛民嘅議席大增，溫和泛民變成少數中嘅少數，估計未來四年議會內嘅掟嘢、爆粗同拉布行為，只會有增無減，令政府相當頭痕。

足以否決議案

有政府中人更指出，根據立法會嘅「在席議員過半數」、「主席在席但不投票」、以及「在席棄權或不投票即等同反對」嘅制度，任何政府議案，只要同時有三十四名議員反對或棄權，都不可能喺立法會通過。工聯會今屆由四席增至六席，連同勞聯潘兆平同廿七名泛民，啱啱好湊夠卅四席，足以否決一啲佢哋認為不利基層民生同勞工權益嘅議案。

政府除咗喺基層勞工議題上面對立法會內嘅民主派挑戰，喺經濟同政治議題方面亦未必完全一帆風順，因為有多次倒戈往績嘅自由黨同新民黨，今屆分別取得五席同兩席，加埋泛民又係啱啱好夠卅四席非常弔詭。如果計埋出名「神經刀」嘅謝偉俊同梁家騮，就更加有過半數嘅卅六席添！

民意最大依歸

特區政府面對一個咁嘅立法會，又唔使咁灰嘅，正本清源，聆聽市民意見就係最大依歸。過去幾年煲呔曾政府塞埋耳仔唔聽市民意見，有新政策就喺石頭爆出嚟，偏離晒新政策必須經過諮詢各方面嘅舊有做法，搞到民怨沸騰，議員至有機會喺立法會發圍。新政府話明聽民意，可能行政立法關係可以打開新局面呢。