中環出更：明霞錦松帶愛女睇無臭豬圈
媽咪擔心BB有冇便便，農戶就關心點樣搞掂豬豬嘅便便。早前國際小母牛香港分會主席梁錦松同身兼小母牛愛心大使嘅太太伏明霞，帶咗九歲的女兒司渝一齊去探訪佢哋七年前探訪過嘅雲南農戶。小母牛幫農戶建設無臭乾爽豬圈。便便唔臭？對！小母牛教村民利用發烤床將豬糞分解，保持農村衞生同豬隻健康。咁有趣嘅「發明」，搞到司渝即刻舉手要幫手收集禾桿草同微生物更換發烤床。
杜振源一家訪汶川
除咗出力，司渝仲割愛，話說司渝見到有個細佢一歲嘅男仔，屋企冇玩具又冇課外書，小伏就鼓勵佢將自己本故事書送畀對方，初時司渝都有啲猶豫，後來大方割愛，仲喺本書度寫上祝福字句添。見到個寶貝女唔怕辛苦又咁主動關懷他人，梁錦松兩夫婦都好欣慰。
至於小母牛籌款委員會主席杜振源就同屋企人去探訪「512」汶川受助災民，同行仲有佢囝囝杜擴業，依家自己創業嘅擴業大讚當地計劃成立嘅土雞養殖合作社有商業頭腦，畀到佢好多啟發。