中環出更：黃英琦唔入熱廚房搞「好單位」
喺文化界頗具影響力嘅前灣仔區議會主席黃英琦（Ada）最近又有新搞作。佢有份創辦、倡導社會創新嘅跨界別聯盟「好單位（The Good Lab）」，尋日下午喺長沙灣星匯居商場開幕，到賀人流逼爆逾二萬平方呎空間。發展商恒基兆業副主席李家誠（Martin）都去撐場，仲拍心口話全力支持Ada嘅理念，所以頭兩年免租，往後將繼續以低租金支持，認真唔話得。
Ada雖然同政府擬於架構重組後新設嘅文化局局長失之交臂，但無損佢瞓身推動社會創新嘅熱誠，卓妮問佢是否抱憾，佢爽快話留喺民間社會，可做嘅事仲多！咁又係，今次「好單位」就集齊五個社企及非政府組織，包括Ada做召集人嘅「MaD創不同」、「黑暗中對話」、社企民間高峰會、香港社會創投基金及香港社會創業論壇，話咁快就號召到一班好人，度好橋，做好事，效率奇高，為有心人開拓創業基地。
許曉暉低調現身
咁啱盛傳係文化局局長人選嘅民政事務局副局長許曉暉都喺度，不過佢一直隱身於眾多賓客之間，並無獲邀上台主禮，事關台上已有政務司司長林鄭月娥坐鎮。主場儀式完成後，許曉暉先至與林鄭、Martin等主禮嘉賓移步至隔籬房，為慶祝成立五周年嘅社企民間高峰會齊唱生日歌。卓妮邀請佢與Ada合照，佢都笑住婉拒，態度好謹慎。
尋日連趕幾場嘅林鄭致詞時話，就算遲到都要嚟見證呢一刻，因為佢睇住「好單位」由零開始，正式開張若無官員嚟撐場，又點體現「民官商」夥伴精神？
卓妮