報名後退選立法會金融服務界議席嘅詹培忠（金勞詹），雖然即將退出政壇，但仍然語不驚人誓不休，事關佢尋晚喺一個有傳媒出席嘅飯局上，疑似大爆行政會議成員張震遠（Barry）嘅秘聞，話對方掌管嘅商品交易所營運情況極之唔理想。
金勞詹尋日喺飯局上風花雪月，不斷大談金融界嘅耳語趣聞，講吓講吓唔知係唔係開心得滯，竟然將矛頭指向Barry，話Barry做主席嘅商品交易所運作麻麻哋，仲質疑賺錢能力有問題，總之就講到商品交易所唔係幾好咁。
商品交易所運作正常
我哋尋晚搵到Barry，佢對於金勞詹講嘅嘢唔逐一回應，但佢重申商品交易所開業一年多以來運作正常，交易量達到二百萬張合約，總值達至一千億美元。