政情：譚偉豪落選遊台散心
現任資訊科技界立法會議員譚偉豪（Samson），喺剛過去嘅立法會選舉中不敵對手莫乃光，失落議席。莫乃光正忙於準備做議員，另一邊廂Samson上星期就飛咗去台灣宜蘭旅行，期間仲去過有名嘅馬告生態公園欣賞參天古樹添。
Samson尋日喺社交網站貼上今次旅行嘅照片，佢話今次係去宜蘭馬告生態公園行山同觀賞古樹，其中最老嗰棵叫「孔子」神木，樹齡已經二千五百五十幾歲。至於Samson照片中嘅大樹，叫「顏真卿」神木，呢棵樹亦不遑多讓，已經有成一千歲咁大。
資訊科技界選情激烈，Samson開票當日亦有到機場亞洲博覽館等結果，據講當佢知道落敗後，曾經一個人好憔悴咁坐喺博覽館某間咖啡店發呆，好似接受唔到選舉結果咁。點都好啦，Samson喺呢輯旅行相總算係笑容滿面，話佢今次去台灣係散心亦不為過。