新一屆七十位立法會議員上任在即，立法會秘書處亦正密鑼緊鼓處理包括分配議員辦公室同座位等行政事宜。我哋前一排講過，議員辦公室已大致上有定案，議席增加至六個嘅工聯會，極有機會被安排去十樓，同人民力量以及社民連做鄰居，據聞工聯會尋日向立法會候任秘書長陳維安反映，希望可以用抽籤方式分配辦公室位置。
消息人士話，工聯會之所以向秘書處提出呢個要求，絕對唔係因為對幾位「新鄰居」有乜唔滿意，大家只係認為，工聯會嘅辦公室絕對唔應該喺「聲都冇得聲」嘅情況下「被規劃」去任何一層，佢哋只係希望秘書處一視同仁，以抽籤方式決定位置，等大家心甘命抵喎。
據講，陳維安聽完申訴後冇即時表態，只係對一眾投訴人報以微笑作回應。其實工聯會就算真係「被規劃」，都唔關秘書處事，事關各黨派一當選就已經積極「劃位」，同黨派嘅「劃」埋一堆方便聯絡，呢個做法可以話已成為傳統，如果抽籤打散晒，好多議員都唔會同意。