政情：長毛放氣球盛惠萬元

Pauline話，喺第一次氣球事件後，秘書處職員已經早有準備，當長毛第二次嘗試放氣球嘅時候，一眾保安就即刻上前制止，令長毛唔小心將個氣球放歪咗，最後卡住喺圓形天花板中間，唔可以好似上次咁利用升降台攞番個氣球落嚟，惟有搵清潔公司幫手，喺議事廳中間搭棚一直搭到上天花板，嘥咗唔少工夫至收拾到殘局。

據講秘書處之後向長毛追討一萬元清潔費，當時長毛仲以為係收番原價一千元添，當知道要支付一萬元時，即時大嗌肉赤喎，唔知佢以後仲敢唔敢再喺會議廳內放氣球呢？