政情：鍾樹根想辭區會主席
民建聯立法會選舉大勝，共有六位新人入局，當中有部分係議政老手，好似首次當選嘅鍾樹根同梁志祥，分別係東區區議會主席及元朗區議會主席，各自雄霸一方，如今成為雙料議員，工作更見繁重。鍾樹根話會用三個月時間睇吓能否兼顧目前工作，如果唔得就會辭去區議會主席。至於梁志祥就以元朗派系及形勢複雜為由，無意辭去主席一職，避免引起爭位爭拗及衝突。
區議會主席向來掌握議會嘅生殺大權，成為政治人物夢寐以求嘅位置，但對於進身立法會嘅鍾樹根來說，佢希望今後以立法會工作行先，如果真係分身不暇，就唔會再做區議會主席。佢仲話，區議會主席開會時間其實唔係太多，但要花好多時間去應酬，基本上區內大小活動都會獲邀出席，唔到又好似唔畀面咁，所以真係要諗清楚，如果真係退嘅話，就會交棒畀後生黨友上位。
元朗多爭拗 梁志祥唔敢退
同鍾樹根情況一樣嘅仲有梁志祥，但祥哥就話唔會好似鍾樹根咁灑脫，就算立法會事務太繁忙，只會退出幾個區議會委員會嘅職務，所以暫時無意辭去區議會主席一職。祥哥解釋，因為元朗區嘅形勢好複雜，上一次副主席之爭已搞到鄉事派同民建聯面阻阻，如果佢唔做主席，分分鐘會引起大爭拗，惟有自己頂住主席一職穩住大局喎，就好似劉皇發同張學明，都係一邊做區議會主席，一邊做立法會議員。
兩人回想今次競選工程都一額汗，亦大讚黨領導仗義解圍，鍾樹根話，原本佢只獲分配東區，但到投票日前最後一星期，曾鈺成願意開放埋灣仔區畀佢；至於祥哥亦話，主席譚耀宗喺選舉後期亦開放自己嘅屯門區畀佢拉票，最終化險為夷。講起民記幾位新丁，原來譚耀宗落咗幾道命令，要佢哋集中火力做好議會事務，包括最少加入四個委員會，亦唔准接受政府委任嘅公職，避免分身不暇。