中環出更：CY宴候任議員主家席露玄機？

陸恭蕙重返政界受歡迎

尋日午宴主家席上，民建聯佔咗四位，自由黨就佔三位，工聯會同泛民就冇份，唔知呢個座位安排，係咪有玄機呢？午宴菜式都幾豐富，七道菜中有清蒸大青斑、脆皮龍崗雞、海鮮焗釀牛油果，仲有燉湯、荷葉飯、點心同滋潤合桃露。CY本身唔飲酒，但都準備咗意大利紅酒畀議員品嘗，夠晒誠意。

難得同特首食晏，唔少議員都爭住向CY發表意見，工聯會王國興更拖埋新人鄧家彪、麥美娟同郭偉強介紹畀CY認識，希望CY盡快訂立標準工時，並設立委員會跟進問題。重返政界嘅環境局副局長陸恭蕙好受歡迎，好多議員都同佢寒暄幾句，梁美芬仲好熱情話自己同陸恭蕙係老朋友喎。

保安局局長黎棟國（中）與同枱議員祝酒。

王國興（右一）介紹幾位工聯會新丁畀梁振英認識。（高嘉業攝）

講到衣着，紡織及製衣界鍾國斌以YSL西裝褸配Hugo Boss領呔，一絲不苟，佢話名牌唔可以盲目着上身，要識得mix & match。首次進身立法會嘅新民黨田北辰就用鮮紅色袋巾搶鏡，佢早前已經坦言同哥哥田北俊嘅政治立場唔同，好難合作，所以尋日都係各自各精彩。

梁振英（左二）逐一握手恭賀議員當選。	田北辰以領呔及袋巾搶鏡。（張家灝攝）	鍾國斌悉心裝扮赴會，對衣着一絲不苟。

曾德成叫錯何俊唔係仁

今屆有四分之一議員係新面孔，要霎時間記得晒佢哋啲名，確係有難度。好似民政事務局局長曾德成，卓妮問佢認唔認得晒啲議員，佢就懶醒話：「差唔多記得晒啦！」但問佢知唔知漁農界個新議員叫乜名，佢就好猶豫咁答：「何……俊……（邊用手勢對住空氣打個大問號）唔係仁！」跟住知自己講錯嘢，隨即以笑遮醜；漁農界候任議員叫何俊賢呀！

卓妮