潮流興佔領同反佔領，被佔領嘅包括美國嘅華爾街以及香港嘅中環。當然啦，最近搞到中日關係非常惡劣嘅釣魚島，亦係一個佔領同反佔領嘅熱點，不過國內同胞嘅反佔領方法非常荒謬，佢哋唔係搵人登島宣示主權，而係四周圍大肆破壞屬於中國人嘅日本汽車以及日本餐廳。喂，莫非中國人打完中國人之後，東洋鬼子就會乖乖滾出釣魚島咩？唔好野蠻得咁天真啦，日本人睇見笑爆嘴o架。
家陣再多一個佔領同反佔領嘅地方，就係以「上水居民居水上」而聞名遐邇嘅上水嘞。邊個佔領上水呢？答案係水貨客。咁又係邊個反佔領呢？答案係一班發起「光復上水站」嘅示威者。示威者揚言每星期都會狙擊來自國內嘅水貨客，直至政府解決問題為止。
水貨客滋擾上水嘅情況已經存在一段時間，當地居民終於忍無可忍。對於日日逼爆上水港鐵站嘅水貨客，居民嘅不滿主要係手推車橫衝直撞，有時甚至撞傷途人，破壞秩序之餘又因為瘋狂購物而搞到上水百物騰貴，隨地吐痰以及亂拋垃圾等等影響衞生嘅「中華國技」更加唔使多講啦。於是乎咯喎，中港矛盾日益尖銳。
前日喎，本來尚算和平嘅示威忽然變得火爆，導火線係一名示威者舉起「中國人滾回中國」嘅紙牌，引起疑似水貨客發難，雙方多次肢體衝突。幾十個警務人員同港鐵保安築成人鏈，並且架設鐵馬分隔示威者同水貨客。衝突期間有人掟水樽同煙頭，甚至有人伸出魔爪掌摑示威者。
水貨客之所以佔領上水，歸根究柢係偉大祖國假貨充斥，乜鬼嘢毒奶粉呀，乜鬼嘢坑渠油呀，乜鬼嘢瘦肉精呀，國人同胞唔想自己嘅五臟六腑淪為一張「化學元素周期表」，咪委託水貨客湧晒落香港「打醬油」囉。
水貨客問題可以點樣解決呢？北區區議會主席蘇西智指出，根據警方向區議會提交嘅數字，執法機關過去兩年充公水貨價值大約五百萬元，但由於利之所在，水貨客難以禁絕，建議政府修例容許警方有更大權力執法，一發現阻街就扣貨先至可以解決問題。
其實計功夫茶話齋，特區政府固然有必要強力執法，不過更加重要嘅係內地政府做好把關工作。若然黑心牌山寨貨色繼續氾濫成災禍國殃民，你估水貨客有冇可能絕迹香港吖嗱？正所謂有需求就有供應，當深圳河以北大量需求安全食品，水貨客作為另類供應商係唔會自動消失o架。
即係咁，打擊水貨客最有效嘅方法係將貪官同奸商徹底殲滅，黑心牌山寨貨一件不留，上水先至有機會回復昔日寧靜。