政情：何俊賢拍拖唔驚畀人影
立法會議員如同公眾人物，一舉一動都備受關注。不過，下屆議會內得票最少、身材最高，且最年輕嘅候任漁農界議員民建聯何俊賢（Steven）一於少理，佢話就算以後做咗議員，都唔會改變原本嘅生活習慣，因為佢始終都只係一個普通市民。佢仲話「行得正，企得正」，唔使驚。
Steven身高超過六呎，就算企喺遠處都好易被認出。佢日前接受我哋專訪時話，其實漁農業界好多前輩都唔記得佢個名，淨係認得佢個樣，知道佢係幫業界做事，所以個個都叫佢做「高佬」。Steven生得咁高，原來佢鍾意打籃球，另外仲鍾意「掃街」周街食嘢。就算當選咗，佢都唔打算改變生活習慣。
Steven唔單止喺黨內極速上位，仲有可能會極速喺十二月同女朋友拉埋天窗。佢話，「結婚啲嘢，忙嘅話咪由女朋友搞，或者屋企人幫手，所以好簡單啫。」問到怕唔怕畀人影到佢同女朋友拍拖嘅生活，佢話：「預咗啦，行得正，企得正，驚咩呀！」