政情：邱榮光陳強敗選有原因
選舉事務處前幾日公布咗立法會選舉每區票站嘅投票結果，喺新界東一直打着鄉事旗號出選嘅經濟動力邱榮光查完票站結果後發現，原來佢喺傳統鄉事票站嘅得票，無佢想像中咁高。邱博士如夢初醒咁款，唔知會唔會覺得被出賣呢？不過佢就話唔好講到出賣咁嚴重，但就一再重申，今次得票唔高確實係有啲「始料不及」。至於未來去向，邱博士就話佢會重返老本行「浮面」，即係繼續搞環保工作。
至於喺新界西同樣落敗嘅陳強，尋日同班老友入馬場，笑笑口咁話民建聯喺選舉期間「又喊又哭」，「哭走晒」佢啲票喎！至於會否捲土重來，陳強話要睇吓點喎﹗
而無連任嘅體育、演藝、文化及出版界嘅霍震霆（Tim）尋日亦喺馬會出現，睇佢戴住一副「少爺鏡」太陽眼鏡優哉游哉嘅樣，應該都係疊埋心水飲新抱茶同埋等抱孫，Tim霍話，兒子啟剛嘅婚禮都留番畀啲後生仔自己搞，不過一講到抱孫喇喎，佢就笑騎騎咁走，唔知呢啲係咪叫恨到出面呢？