政情：星爺心雄組十人聯盟

原來橫掃十席只係星爺嘅一個目標，但仲未成事嘅，據了解真係應承咗加入嘅暫時都係得三、四位議員，而且佢哋都唔使綑綁投票，一個無乜約束力嘅組織可以發揮到乜嘢效用，真係要放長雙眼睇喇。

重返議會後想有一番搞作嘅星爺話，只要係傾得埋嘅議員，無論以咩形式合作都無所謂，未來一星期會約見其他議員商討合作空間，因為多個朋友好過多個敵人，不論係經濟動力林健鋒、廠商會代表林大輝等，佢都會坐低同對方慢慢傾。咁呢個大聯盟改咩名好呢，星爺就話由於唔想有太綑綁嘅意味，所以新組織唔傾向用「派」、「黨」呢啲字眼，亦唔會有個「中」字，避免中資色彩過濃喎，又話聯盟成員都係嚟自工商界，估計都離唔開「工商」、「專業」呢啲字眼。

心水石禮謙 唔預梁美芬

據聞星爺除咗同旅遊界姚思榮、中總廖長江、體文界馬逢國同工程界盧偉國後，亦有意搵埋地產及建造界石禮謙，如果成事，咁梁美芬點算呢？星爺好坦白講，相信個聯盟以功能組別議員為主，如果有直選議員加入，投票時可能會有太多顧慮，所以未必會預直選議員喇。

功能組別大整合 機會微

其中一位功能組別人士同我哋講，功能組別嚟個大整合當然好，同星爺合作亦唔係問題，但要放棄自己塊招牌而加入星爺嗰檔，機會就微乎其微。佢話不如星爺等人加入已經存在嘅「工商專業聯盟」，每星期舉行例會，各組織就派代表開會，大家傾下投票取態，商討下點樣同政府談判等。以往「工商專業聯盟」出晒名係無米粥，大家傾完一輪都無共識，夠晒無約束力，唔知星爺覺得吸唔吸引呢？

建制派嘅整合拉攏潮愈嚟愈白熱化，但泛民方面仍然唔心急，幾位泛民大老都去咗旅行散心，據聞最快要下個星期至可以坐低開會，睇嚟泛民要團結一致對抗建制派，真係講多過做。