中環出更：梁太撐環保回收廚餘
特首梁振英（CY）好環保，主張回收廚餘，其夫人唐青儀原來全力響應。梁太尋日出席「世界清潔日」環保活動，話佢同親友食飯時，一定會擺定幾個膠盒喺枱面，將預計有剩嘅食物先夾起，咁就唔會有人要食口水尾喇。梁太又話同CY出街食飯就一定唔會有嘢食剩，因為CY成日提住唔好叫咁多嘢食，夠食就得嘞。
原來梁太係環保團體綠色力量嘅名譽贊助人，一直都支持環保。佢話同CY身體力行，家中放一部廚餘機，就算有剩飯剩菜，都可以將廚餘倒入部機，轉為肥料，咁就唔會浪費。
CY鍾意食家鄉山東月餅
問到中秋節點慶祝，梁太就話CY好鍾意食家鄉嘅山東月餅，月餅嘅饀唔係雙黃白蓮蓉，而係豆沙同欖仁，普通人未必鍾意食。活動中途有段小插曲，有同場嘉賓被問到點樣提醒老人家少送月餅，就幽默咁話「同佢哋洗腦囉」，逗得大家哈哈大笑，仲個個望向梁太，梁太就依舊笑容滿面，無理會有乜弦外之音。
卓妮