中環出更：杜振源睇好樓巿
美國第三輪量化寬鬆貨幣政策（QE3）出爐，進入無限印銀紙時期，唔少人都擔心香港樓市將被炒高。尋日卓妮喺沙田馬場見到「快勞夾大王」杜振源（Simon）同太子珠寶鐘錶執行董事朱繼陶（Joseph），二人不約而同咁認為，未來香港樓市會繼續升。
Simon話，依家樓市仲高過九七嗰陣，雖然早排港府推出咗樓市十招，暫時未睇到有明顯效果。佢話現時首要係穩定樓市，但唔希望樓市跌得太急，因為急上急落都唔係好現象。而港府計劃將工廈改建為住宅，Simon本身喺葵涌擁有工廈，早年已將工廠搬返內地，依家工廈用嚟放租，但租金偏低。佢話如果政府改建住宅後，利潤比放租高，佢都會考慮改建。
Joseph話，QE3推出令銀紙貶值，所以大家會湧晒去買物業保值，到時樓市肯定會繼續升，直至息口上升，樓市先會跌。對於近日「光復上水站」事件令中港矛盾加劇，Joseph話係執法問題，如果內地海關部門執法夠嚴謹，就可杜絕水貨客。海皇粥店老闆蕭楚基都話，倘港府正視問題，兩地海關加強合作打擊水貨客，問題終解決。
陳茂波夫婦輕鬆吓
信興集團副主席蒙德揚（David）都喺度，為佢有份嘅團體馬「頌友」打氣。問佢點睇釣魚島主權紛爭導致內地人毀壞日資百貨一事，佢話香港係法治社會，港人理智得多，唔會出現呢個情況。佢仲話，釣魚島其實好細，爭執屬象徵意義居多。卓妮仲見到早排牽涉劏房風波嘅發展局局長陳茂波夫婦孖住入馬場，睇嚟佢哋已經拋開煩惱，趁周日輕鬆吓。
卓妮