龜兔賽跑嘅古仔大家耳熟能詳，人人都知應該做努力不懈嘅烏龜，唔好做不思進取嘅兔仔。不過咁，知道係一回事，做唔做到又係另一回事，香港呢隻大懶兔究竟仲要瞓到幾時，係咪要畀烏龜爬頭先至知驚？
嗱，勤力嘅烏龜又殺到喇！台灣為咗催谷旅遊業，首次喺香港舉行「打工換宿遊台」活動，又搞大學生招聘會，又搞過來人分享會，大鼓大鑼，無非就係想吸引香港客，發展旅遊業。
話時話，台灣近幾年開拓客源不遺餘力，繼開通內地赴台個人遊大賺人民幣之後，家陣又向香港年輕客源招手，積極進取，唔係講笑。
喺呢條爭奪旅客嘅賽道上，台灣擺明車馬，愈戰愈勇，香港又點呢？犀利咯，唔止大安旨意大覺瞓，仲玩埋讓賽添。當全世界都千方百計吸客嘅時候，香港就反其道而行，實行閂門趕客，連內地放寬個人遊都唔歡迎。全世界發展旅遊業，只會嫌遊客太少，點會嫌遊客太多o架，香港人簡直就係嫌錢腥！
功夫茶想提醒大家一件事，美國點解明知係飲鴆止渴，都要推出第三輪量化寬鬆措施，原因咪就係經濟疲弱、失業率高囉。香港明明可以藉放寬個人遊增加旅客，刺激經濟，依家居然趕客自斷米路，驕傲兔仔何止係懶，簡直就係蠢！
旅遊業趕客等如自殺，偏偏香港幾乎日日都發生呢種醜聞。例如，遊客住宿安排就經常引起爭議，旅遊業議會最新數字顯示，內地團遊客不滿住宿安排嘅投訴有上升趨勢，過去八個月總共接獲十五宗。又例如，無品的士司機劏客嘅問題禁之不絕，最近有女警假扮遊客放蛇，成功拘捕一名濫收車資嘅司機。有人話，的士係一個城市嘅名片，的士司機劏客，證明呢張名片係幾咁醜陋。
咁講啦，台灣大張旗鼓宣傳旅遊業，香港旅遊業都有宣傳，不過係負面宣傳，惡導遊亞珍名揚神州、纜車吊吊揈蜚聲國際、內地團住宿投訴激增、劏客的士司機橫行……再咁落去，香港「旅遊之都」塊招牌遲早不保嘅咋！
當局嘅旅遊宣傳口號係咁嘅：「今時今日咁嘅服務態度未夠o架。」計功夫茶話齋，香港今時今日嘅食老本心態好唔掂就真。港產官僚真係要醒醒定定，重新發力，急起直追，反省點解旅遊業服務質素愈來愈差？如果係酒店房間不足，就要諗計增加供應；如果係業界經營手法不良，就要加強打擊。無論如何絕對不容繼續做大懶兔，如果唔係，第日喺旅遊業賽道上輸足九條街，咁就丟晒架嘞！