政情：白鴿《賣港實錄》進駐港大
立法會選舉曲終人散，相信唔少市民選舉期間都收咗唔少候選人嘅宣傳品，款式琳瑯滿目，但要數最矚目嘅，相信係人民力量狠批民主黨（白鴿黨）賣港嗰本《偽民主派賣港實錄》喇，尋日仲有網民發現呢本賣港實錄已經進駐香港大學圖書館添！
喺港大圖書館嘅圖書資料庫竟然可以搵到呢本《偽民主派賣港實錄》，網友們都大感驚訝，紛紛猜測港大會收藏呢本小冊子嘅理由。有網民估計，圖書館今次咁做，純粹係因為要保存今次選舉嘅資料，叫大家唔好大驚小怪喎，但點都好啦，有呢個發現，人民力量嘅粉絲都感到鼓舞。
人民力量選舉期間推出咗呢本翻白鴿黨舊帳嘅宣傳品，旨在令選民認清邊個係堅實嘅民主派，邊個係面目模糊、呃選民呃足幾十年嘅偽民主派。人民力量今次選舉成績唔錯，吸納咗唔少不滿白鴿黨嘅選民，今次佢哋本宣傳品仲畀港大保存埋添，對佢哋嚟講真係雙喜臨門。