政情：「梁粉」胡曉明 掌城大校董會
香港城市大學校董會主席一職懸空多時，港府尋日宣布，特首梁振英（CY）已委任專業及資深行政人員協會前會長胡曉明（Herman）出任校董會主席，接替早前已離任做審計署署長嘅孫德基，任期由今年十月起至一四年底。
接替孫德基任主席
原本有公職空缺換人填補係正常不過嘅做法，但有心水清嘅人發現，其實孫德基同Herman都係CY嘅支持者，換言之即係「梁粉」接「梁粉」囉！
事實上，城大校董會主席一職近年同CY都有直接同間接關係，首先CY本人曾經做過多年城大校董會主席，直到去年十月備選特首時卸任校董會主席一職，之後到今年二月先由做過會計師公會會長嘅孫德基接任，點知做唔夠幾個月，CY當選特首後又羅致咗孫德基做審計署署長，校董會主席一職又懸空，直到尋日先搵到Herman接手。
Herman係「電梯大王」胡法光嘅兒子，活躍於政商及體育界，依家擔任多項公職。對於Herman出任城大校董會主席，教育局局長吳克儉大讚曾任城大校董會成員嘅Herman，對高等教育界別以至整個社會均貢獻良多，深信佢能夠帶領城大穩步向前，再創高峰。