政情：葉劉爭做「保安」揸Fit人
好多資深嘅立法會議員喺啱啱嘅選舉連任失敗，導致立法會各大事務委員會正副主席「大執位」，最受關注嘅焦點就係內務委員會主席爭奪戰。早前盛傳新民黨主席葉劉淑儀為內會主席熱門人選，但佢近日忽然有意擔任保安事務委員會主席，有傳係葉劉唔想每星期都同「妹妹」政務司司長林鄭月娥見面同交手，另一用意係建制派想葉劉取代敗選嘅劉江華，喺委員會內監察及制衡泛民主派嘅涂謹申。
新一屆立法會喺下月十日開鑼，七十名議員須宣誓及選舉立法會主席，同日下午則會選出內會及財務委員會主席。眾所周知，內會主席向來被視為立法會嘅第二把交椅，冇咁上下資歷都好難壓得住場，政圈有傳葉劉及重返議會嘅自由黨田北俊都有意問鼎內會主席一展身手，但有關消息曝光後即「見光死」，取而代之係會喺經濟動力林健鋒同梁君彥之間「二揀一」。至於葉劉就轉戰保安事務委員會。
傳唔想同林鄭有來往
有消息話，葉劉失諸交臂嘅底因係另有任務，據聞佢日後會肩負同超級區議員涂謹申喺保安議題爭奪話事權嘅重任，當然亦有傳葉劉唔想同佢口中嘅「妹妹」林鄭月娥有工作往來有關。至於田少嘅大熱倒灶，有消息話自由黨嘅人做咗內會主席好多年，再做就予人「世襲」嘅感覺，加上外間對田少嘅反應一般，據聞田少都有自知之明，突然對外表明一定唔會做內會主席，該黨亦都唔會派人參選喎。
除咗內會主席一職競爭激烈外，負責審議撥款嘅財務委員會主席亦係另一個焦點，白鴿黨劉慧卿最近率先表態想角逐連任，但一切有待該黨再作決定。至於重返議會嘅工聯會陳婉嫻則事先張揚會加入福利同人力事務委員會，首選係做福利事務委員會主席喎，究竟佢哋能否如願以償，相信好快就會明朗化。另外，政府帳目委員會、人事編制委員會及交通事務委員會嘅原正副主席，亦放棄連任或喺選舉中落敗，所以勢必掀起新一輪大執位。