搵食難，湊仔難，搵得食來又湊仔，難難難難難難難！
功夫茶今日想同大家分享一個良心好老闆嘅故事。有一間時裝店喎，老闆係陳小姐，六年前知道有一個單親媽媽明姐身世可憐，依靠執紙皮賺取卑微利潤撫養一仔一女，基於惻隱之心就想請明姐返工。之但係咁，明姐嗰個寶貝女只得幾歲，身為一個冇人冇物嘅單親媽媽，返咗工邊個湊女呀？任佢出街又驚學壞，獨留家中又怕犯法，請人託管咩，窮等人家無財不行。於是乎良心好老闆陳小姐就話嘞，得得得，帶埋個女一齊返工啦。就係咁，明姐做咗兼職倉務員，生性懂事嘅乖乖女就喺媽媽身邊讀書溫習。陳小姐就話嘞，咁先至可以真正幫助有需要嘅家長走出困境，唔係捐筆錢就算。
之所以要分享呢個故事，無非係話畀大家知，社會福利署話就話推出「欣曉計劃」，鼓勵低收入單親家長外出工作，從而脫離綜援網，不過成效不彰囉，關鍵原因係返工期間冇人照顧仔女。社區團體就批評嘞，社署政策缺乏完善配套。
資料顯示，現時六至十二歲低收入家庭兒童約有十萬人，目前由社署提供嘅託兒資助全費名額只有一千五百個。免費託兒名額少得咁淒涼，咁有冇退而求其次嘅收費託兒服務呀？有係有嘅，非牟利團體亦設有六歲以上兒童嘅「課餘託管津貼計劃」，名額大概五千五百個，不過每月收費近千元，卑躬屈膝都係賺得雞碎咁多嘅單親家庭根本負擔唔起。
簡單咁講，窮到燶嘅單親家長唔係唔想搵嘢做，並非歌神許冠傑口中「日日攤响屋企等米路」嘅莫大毛，只不過社署做啲唔做啲，名義上鼓勵就業，實際上阻人米路。喂，社署冇提供足夠嘅託管資助，分身乏術嘅單親家庭有乜可能走出屋企搵米路呀？
得到陳小姐容許做「帶子洪娘」嘅明姐算得上係比較幸運嘅一個，其他未遇上良心好老闆嘅單親家庭，唔知幾時先至可以自力更生脫離綜援網。事實上，欣曉計劃自從○六年推出至今，二萬五千名參與者之中只有一千人脫離綜援網，成功率僅僅百分之四，足以說明社署係幾咁失敗。
香港單親協會總幹事余秀珠就話嘞，欣曉計劃未有正視託管嘅需要，以致成效不理想，希望能夠同關愛基金推廣嘅課餘託管試驗計劃融合，令更多學校推廣課後託管班，咁單親家長先至放心外出工作。
即係咁，唔該社署助人脫離綜援網嘅配套措施唔好咁天殘地缺，諗諗辦法補充不足之處，否則搵食艱難嘅單親家庭永遠無法突破貧窮線o架，該煨！