政情：袁彌明要漂白搵老公
代表人民力量參加立法會新界東直選嘅袁彌明（Erica），雖然名單第二入唔到局，但尋日都笑容滿面咁同排頭位當選嘅戰友陳志全（慢必）落區謝票。我哋問Erica嚟緊會有咩大計啦，點知佢就話依家最大嘅計劃係搵老公，條件係政治理念一定要同佢相同。原來之前四出拉票搞到皮膚曬黑咗嘅Erica，已經急速訂咗「漂白」美容療程，真係女為悅己者容。
對於慢必公開同志身份，Erica就話其實佢哋一早就知，以前有人見慢必施展「蘭花手」，都有問過佢呢個問題。不過，唔使再同慢必「情侶檔」拉票，Erica就同我哋大呻，覺得同慢必一齊工作「好冇趣」，「一齊拉票做嘢幾個月，同個男人一齊，但係佢眼尾都唔望吓我！」Erica都算幾標致，靚女冇人理，又難怪佢不滿嘅。
今次選舉人民力量嘅成績都算唔錯，Erica話佢會同主席劉嘉鴻、慢必、「星屑醫生」歐陽英傑夫婦，計劃去泰國旅行慶祝。待嫁心切嘅Erica唔知會唔會有艷遇呢？