政情：重磅張華峰 驚立會位坐唔落
證券界重量級人馬張華峰，當選立法會金融服務界議員後，大家都好關心一樣問題，就係呢位擁有大肚腩嘅議員，坐唔坐得落立法會個座位呢？如果坐唔落嘅話，唔通要立法會特別訂造個加大位畀佢坐？峰哥就話唔使喇，因選舉已令佢減肥成功，足足瘦咗三十磅喎。
峰哥話，今次選舉在公在私都好開心，因為日日喺三十幾度高溫下拉票，有時連晏晝都冇時間食，選舉後成功瘦身，總共減咗三十磅，依家條腰只係得番四十二吋，行路時都輕鬆好多。峰哥仲自爆喺當選前，好多朋友都笑佢話要坐加大座位，當時佢都驚過，但現時減磅成功，呢個疑慮已經一掃而空。
有立法會中人話，每個座位都好闊落，就算峰哥冇減肥都應該坐得落，至於點解計得咁準？原來有人衡量過，覺得張華峰同即將卸任嘅漁農界議員黃容根差唔多「分量」，如果根哥坐得落，峰哥冇理由唔得啩？不過，事實上根哥同峰哥磅數差咁遠，比較唔太合理喎，相信叫峰哥親身試吓個位穩陣啲。