市民投票選議員，好多時係睇政黨，因為政黨可以反映候選人對各種問題嘅理念，特別係新人出選，「招牌」特別緊要。不過打正人民力量旗號出選嘅九龍東候選人黃洋達就話，佢支持嘅係人力嘅黃毓民而唔係支持人力喎。好彩佢無當選，否則投咗票畀佢嘅市民，都唔知點同佢算帳嘞。
尋日有市民喺facebook問黃洋達，熱血公民喺選舉過後仲算唔算係人民力量呢？點知黃洋達話呢件事要再同毓民傾，因為佢個人立場而言，根本唔支持人民力量喎，自己最多只係毓民「教徒」。有網民叫佢同「慢必」裏應外合，黃洋達又斬釘截鐵回應話「才不會！」
選完兩日後即刻反面，好多網民都睇唔過眼，話既然佢咁唔支持人力，應該一早出聲，唔好輸咗後先講埋呢啲嘢。不過亦有死忠粉絲硬撐黃洋達，話佢做事既然無離開公義，無論佢去邊個政黨，大家要繼續支持佢喎。我哋諗住問黃洋達點解會咁講，但打咗畀佢幾次都無人聽。