政情：新丁舊人 撞名又撞樣

啱啱選出嘅新一屆立法會議員入面，共有十三個地方直選及十五個功能界別新丁，當中有好多個好似樣，就連個名都好相似。好似雙雙進入議會嘅田氏兄弟，佢兩個似樣就好正常啫，點知連建築、測量及都市規劃界議員謝偉銓，都同首次挑戰九龍東直選勝出嘅謝偉俊都好似樣，佢哋好耐以前已經被誤會係兩兄弟，但事實上當然冇任何關係啦！

至於姓名相似嘅議員，就有漁農界嘅何俊賢，佢個名同白鴿黨何俊仁只係差一個字，唔知嘅仲以為佢哋係兩兄弟。不過，漁農界只有百幾票，除咗業界外，相信未必有咁多市民認識何俊賢，睇嚟佢真係要諗計宣傳吓至得喇。另外，我哋又發現「貪勝累泛民」嘅公民黨，多名黨員姓名都有個「家」字喺中間，莫非「家」字今年特別旺？

新「議會方中信」誕生

除咗姓名相似之外，有議員樣貌都同藝人相似，講緊嘅係有「議會方中信」外號嘅單仲偕，雖然佢成日被稱為「(先刂)雞」，但睇番佢以前個樣，兩條粗粗嘅眉同「矇豬眼」，又真係有幾分似方中信喎。不過，近日就有人話當選紡織及製衣界嘅自由黨鍾國斌會成為新一代嘅「議會方中信」，係咪真係似樣，就要等大家去評價喇。

其實，以前立法會同立法局年代都成日有啲似樣及似名嘅議員搞到市民亂晒龍，例如叫耀宗或同音嘅民建聯譚耀宗、街工梁耀忠、教聯會長楊耀忠。有個「國」字嘅議員，就有衞生服務界李國麟、直選嘅工聯會王國興及黃國健。似乎啲議員若要市民一睇就認得出嘅話，就要加把勁勤力啲服務市民，提升個人知名度喇！