中環出更：廖偉芬教招積飲咖啡
港人愈來愈懂得享受咖啡時光，連咖啡館都走殿堂級路線。廖創興家族後人廖偉芬（Jennifer），近日喺銅鑼灣開設喺歐洲及日韓極之盛行嘅精品咖啡店。作為全港首間精品咖啡店，摒棄千篇一律式沖泡方法，教港人飲得招積。
美國康乃爾大學畢業嘅Jennifer，係準建築師，家族收租物業數以億計，但佢唔想伸手靠屋企，○三年沙士後進軍飲食界，短短幾年創立兩個咖啡品牌。近年港人飲咖啡風氣漸盛，要求漸高，佢於是走遍世界各地吸收飲咖啡精華，引入精品咖啡店。
Jennifer嘅二千呎新店，一杯一枱一個咖啡壺，都係精品，就連咖啡師，也帥氣如韓劇內的咖啡王子，二十歲出頭嘅首席咖啡師森仔，就曾奪得世界咖啡師大賽香港區冠軍。
提供多款沖泡方法
沖咖啡，好似表演藝術，有歐洲復古式手沖咖啡法、日式冰滴咖啡法及美式氣壓式沖咖啡法，任君選擇。為炮製新鮮咖啡，也騰出二百呎地方，放置一部千磅重巨型炒咖啡豆機，輪流烘焙中美、南美、非洲及亞洲等地的咖啡豆。
咁有創意，Jennifer話，全因留學美國時受同學啟發，將香料、橙片、棉花糖與咖啡共冶一爐。Jennifer樂於將心得與人分享，年前開辦咖啡課程，至今培訓逾三千名學生，嚟緊將引入歐美咖啡文憑課程及咖啡學位課程，誓要打破香港咖啡難登國際大賽舞台嘅宿命。
卓妮